Presidenti gjerman Frank-Walter Steinmeier vlerësoi sot se duhet bërë përgatitje për “luftën e gjatë” në Ukrainë, ku ofensiva ushtarake ruse hyri në javën e dytë.

Në një deklaratë nga Lituania, ku ai vizitoi forcat gjermane të vendosura si anëtarë të NATO-s, Steinmeier tha se ai “nuk pa shenja” se kjo luftë “do të përfundojë së shpejti”, transmeton portal arbresh.info

“Ndoshta do të duhet shumë kohë dhe ne do të jemi të duruar”, tha presidenti gjerman në bazën ushtarake në Rukla në qendër të vendit pranë homologut të tij lituanez Gitanas Nauseda.

Ai tha se lufta ishte një “shkelje e ligjit ndërkombëtar” dhe siguroi Lituaninë, e cila ka frikë se mund të jetë objektivi i ardhsëm i Rusisë, se mund të llogariste në solidaritetin e NATO-s .

“Askush në histori nuk do të jetë në gjendje të justifikojë atë që po ndodh tani në Ukrainë,” tha ai, duke shtuar se “prindërit po humbasin fëmijët e tyre, fëmijët e tyre po humbasin prindërit e tyre, njerëzit po humbasin gjithçka”, tha ai.

Gjermania po udhëheq një grup luftarak shumëkombësh të NATO-s të vendosur në Lituani dhe së fundmi ka rritur numrin e trupave të saj, shkruan Reuters.

Ministri i Jashtëm lituanez Gabrielius Landsbergis tha në Vilnius pas një takimi me Sekretaren e Jashtme britanike Liz Trass se NATO duhet të kalojë “nga parandalimi në mbrojtje”.

“Për këtë na duhet një ndryshim i pozicionit politik dhe disa mjete konkrete. “Këto fonde janë vendimtare për vendet baltike, në mënyrë që agresori të përballet me një përgjigje sapo të vendosë të testojë qëndrueshmërinë e NATO-s,” tha Landsbergis./arbresh.info/